سفرنامي جون مُوڊ آف ڪندڙ يادون...

19/04/2016
#Iran
#Qum

سفرنامي جون مُوڊ آف ڪندڙ يادون...

اي مالڪ توبھ تو در...

جڏھن ايران جي شھر قُم ۾  بيبي فاطمه ڀيڻ امام رضا عليه السلام جي روضي جي لڳ واري بازار ۾ نڪتس ته اھو گوشت جو شاپ ڏٺم.پاڪستان ھجي يا ايران ماڻھو ته صفا ماس کائڻ جي معاملي ۾ ڪو لحاظ ڪن ئي ڪونه.مون جھڙي مڪمل سبزي خور ( ويجيٽرين) لاء اھو سڀ ڏسڻ ۽ سامھون فوٽو ڪڍڻ ئي وڏي ڳالھ ھئي.موڊ ئي صفا آف ٿي ويم جڏھن ھي سڀ پنھنجي اکين سان ڏٺم.ويجھي ويندي ئي خوف پئي ٿيم ته اھي ساھ وارا جانور ڪٿي خدا جي قدرت سان زنده ٿي اتي ئي بدلو نه وٺن.
سوچڻ جي ڳالھ آھي الله جي ذات کائڻ پيئڻ لاء ايتريون سبزيون ، ايترا لذيذ ميوات پيدا ڪيا آھن پر جي ماس حلال ڪيس ته ماڻھو ته صفا ماس پويان چرين وانگي چنبڻي پيا.ايڏو چٻائي کائين ٿا، ايڏو وات ۾ ھڏيون وجھي کائن ٿا، ڄڻ ڪو ڪٿي ڪامپٽيشن ۾ ھارائي نه وڃن.توبھ توبھ توبھ

ڪوس گھر ۽ گوشت جا دڪان جھڙا پاڪستان جا تھڙا ئي ايران جا ، جانورن جو ساھ سڀئي ھڪجھڙو، نڪرڻ مھل تڪليف اوتري ئي ٿيندي ھوندن.فرق ايترو جو پاڪستان ۾ جانورن جي اڇليل عضون مٿان پکي ۽ ڪيڙا توڙي رولاڪ ڪتا پيا لامارا ڏيندا، نڪتل رت  پري پري تائين پکڙي پئي ھوندي.وڪڻڻ لاء آندل گوشت مٿان لکن جو لَڏو مکين جو اچي لھندو ۽ ڪات ۽ ڇرين تي ايلفي جيان چنبڙيو پيو ھوندو ، ڪاسائي اھڙو ڏسڻ ۾ ايندو جھڙو ڪو عزرائيلي روپ ھجيس ۽ مھيني کان نه ھٿ  منھن ڌوتو ھجيس نه ڪپڙا بدلايا ھجيس.باقي ايران  صاف صفائي  ۾ چيمپيئن آھي.اھي ساڳيا ئي گوشت صفائي سٿرائي سان شيشن ۾ رکيل ملندا،
جيڪر اوھان وٺندو ته پلاسٽڪ جي ٿيلھي ۾ پيڪنگ سان  1ڪلو يا 5 ڪلو وغيره جيترو وٺو اوترو پيڪٽ ملندو.باقي مکي يا مک ايران جي ٿڌي ملڪ کان سخت ناراضگي سبب احتجاجن وڃي ئي ڪونه.ھڪ اڌ ڪا پاڪستاني قافلي سان گڏ گھمڻ لاء زاھدان پھچي ته پھچي پر مجال آھي جو اڳيان وک وڌائي.اتي ئي اختتام پذير ٿيو وڃي.
سو چوڻ جو مقصد اھو ئي ته اھي گوشت جا دڪان ڏسي منھنجو موڊ ئي خراب ٿي ويو.خدارا سبزيون کائو ، دال کائو، سڀ کان سٺا ۽ شڪل ۾ وڻندڙ آلو اٿو اھي ئي کائي وٺو پر گھمندڙ ڦرندڙ مرغين کي ڪھو ٿا، مزي سان رانديون ڪندڙ نوجوان ٻڪرا ، مينھون اٺ ، رڍون ڪھو ٿا ته مان ان جي مخالفت ڪندس.خدارا سڀن کي آزاد گھمڻ ڏيو.
مشھور نعرو ياد ٿو اچي ته جيو اورجيني دو...

ماھم سنڌي.